Eskerrak eman nahi dizkizuet halako laguntza desinteresatua eskaintzeagatik. Nire ustez, oso lagungarria da, jende ezagutzeaz gain, mintzamena lantzeko, ikasteko eta lasaitasunez erabiltzeko. Mila esker, bihotzez.

Ni oso pozik egon naiz. Lehenengo aldiz hartu dut parte programa honetan; beharrik ez nuenez, lehenago ez zitzaidan bururatu ere egin, bai etxean bai lanean euskaraz egiten dudalako, baita lagun batzuekin ere. Programa osatzeko, pertsonak behar zituzten, eta nirekin harremanetan jarri ziren. Uste nuena baino aberatsagoa izan da. Jende berria ezagutzeko aukera eman dit, eta nire euskeraren erabilera hobetzea ahalbidetu. Hau da, hasieran, besteei laguntzeko asmoz eman nuen izena, baina niri neuri ere asko lagundu dit. Datorren urtean, aukera izanez gero, berriz emango dut izena, ziur. Lan ederra egiten ari zarete!

Lehenengo aldia da mintzalaguna naizela. Herrikide bat ezagutu dut, asko gozatzen dut euskara ikasten ari direnei laguntzen, eta iruditzen zait, gozatu ala ez, egin beharreko lana dela: ikasten ari denarekin denbora hartu, pazientzia izan...

Egia esan, hizkuntza ikasteko nire erabakirik onena izan da, eta, gaur egun, euskara maite dudala esan dezaket. Horrez gain, mintzapraktika-programa oso aproposa da jendea ezagutzeko. Horregatik, espero dut urte gehiagotan berbalagunekin egotea.

Gurasolagunek Urduñako beste familia batzuekin mintzapraktika egiteko aukera eman digu, batzuekin kalean ez baitugu egiten. Nire haurra ere giro euskaldunean jolastu ahal izan da.

Auzora euskara eraman eta zabaldu egin dugu. Berbataldea baino, lagun-taldea gara, eta gure komunikazio-hizkuntza euskara da.

Mintzakiden hiketan aritzeko aukera daukat eta egunerokotasunean erabiltzeko motibazioa piztu dit.

Bi lagun berri egiteaz gain, haientzat euskara praktikatzeko lagungarria izan daitekeela pentsatzeak poztu egiten nau. Gainera, beste hiru mintzakiderekin online aukera erabili dut.

Hiketalagun-taldea hitanoa berreskuratzeko aukera paregabea da.

Euskaldun gisa euskararen erabilerarekiko jarrera aldatu eta hizkuntza-komunitatearen alde zerbait egiten dudala sentitzea. Jendea lagunduz, pertsona paregabeak ezagutzea.

Pertsona interesgarri batzuk ezagutu ditut, dagoeneko baten bat lagun ere, eta haien euskara maila hobetzen doala ikustea pozteko motiboa da.

Hika hitz egiten hasteko aitzakiatan bailarako bizilagunekin sozializatzea, bailarako kontu zaharrak entzun, hitz berriak ikasi...

Nire bikote zein alabarentzako euskaraz egiteko eta euskaldunak ezagutzeko foroa da.

Euskararen mundura hurbiltzeko aukera ona da, praktikatzeko, euskaraz bizitzeko eguneroko gauzak egiten dituzun artean, beste lagunak sortzeko...

Lagun berriak egiteaz gain, ikasturtea hasi zenean baino jariotasun handiagoa dudalakoan nago. Horren ondorioz, programa honek segurtasuna eman dit.

Oso ongi pasatzen dugu: ibilbideak egiten ditugu, beste mintzakideen herriak eta historia ezagutzen ditugu, eta gure artean euskaraz hitz egiteko ohitura hartu dugu.

Euskararen erabilera sustatzeko modu bat, erraz eta dibertigarria, euskara familian barneratzeko jarduera ezberdinak eginez.

Euskaraz bizitzeko esparru aproposa. Gainera, lagunak egiteko aukera dago, baita aisialdiaz disfrutatzeko ere.

Euskara praktikatzeko primerako aukera dela uste dut. Online, ez duzu denborarik galtzen eta etxetik, oso modu erosoan, mintzapraktika egin dezakezu. Anima zaitez parte hartzera!

Lagun berezi batzuekin ostiral goizean kafe bat hartzea. Oso gustura egoten gara, eta gure artean ez dago lotsarik.

Primeran dago euskara ikasteko edo praktikatzeko. Jende berria ezagutzen duzu, eta, batez ere, gure hizkuntza mantentzen dugu. Hori guztia egiten duzun bitartean, zure gustuko ekintza bat egiten duzu, zuk aukeratzen duzulako zer egin nahi duzun: kafea hartu, buelta bat eman,etab. Eta, zure zaletasunaren arabera, talde batera edo bestera joango zara.

Nire kasuan, hizkuntzarekiko eta nire herrian zein hizkuntzatan bizi nahi dudanarekiko hartzen dudan konpromisoa da, nik nire aldetik egin dezakedan eskaintza. Norbait animatzeko, niretzat oso esperientzia aberasgarria dela esango nioke, eta herriko harreman-sarea handitzeko aukera ematen duela; bestela ezagutuko ez nukeen jendearekin hitz egiteko eta norbera aberastekoa.

Askoz gehiago ikasten da eskolatik kanpo ikasiz eta praktikatuz. Eta, gainera, lagunak egiten dituzu.

Euskaraz hitz egin nahi baduzu, aukera ona da. Hitz egiterakoan lotsa galtzen eta norbere buruarengan konfiantza gehiago izaten laguntzen dute saioek.

Euskaraz praktikatzeko programa ederrak antolatzen dira. Hau da, ekintza interesgarriak, errazak eta oso atseginak. Eta mintzapraktika sortzeko eta indartzeko era atseginean.

Sozializatzeko modu desberdina, dibertigarria, eta euskara ikasteko primeran dago. Gainera, dohainik.

Niretzat, mintzapraktika da une egokiena euskaraz hitz egiteko, zeren eta nire herrian ez baitago euskaraz gozatzeko beste aukerarik. Guztiz gomendagarria da, eta nik esango nuke nahitaezkoa dela zure ahozko euskara hobetzeko edota garatzeko.

Izugarrizko aukera da euskara praktikatzeko eta seme-alabei lagundu eta haiekin ere euskaraz egiteko.

Nire ustez, mintzapraktika-programa oso lagungarria da euskara lasai erabiltzeko . Lagunei esango nieke erraz ikasten dugula eta denbora azkar pasatzen dela.

Programa honi esker, jende asko ezagutu dut, lagunak egin ditut, eta, horretaz gain, euskaraz mintzatzeko beldurra galdu dut.

Urte batzuen ondoren, lagunak gara, nire bizitzan beharrezkoak dira. Asko disfrutatzen dut taldearekin.

Oso ondo dago mintzapraktika hobetzeko eta beldurra galtzeko. Taldea oso ona da, eta primeran nago denekin.

Harremanak euskaraz sustatzeko, sortzeko eta mantentzeko ezin hobea da. Astean behin elkartzen gara, eta sortzen den giroa oso ona eta aberasgarria da.

Giro ona dago, euskara pixka bat erabiltzeko; bestela, ziztu bizian ahaztuko duzu. Ez dizu eskatuko denbora luzea. Batzuetan, nagikeria sentitzen duzu, baina gero gustura egoten zara.

Niretzat, mintzapraktika hoberena da euskararen maila mantentzeko. Euskaltegira ezin naiz joan, momentuz, eta, pixkanaka-pixkanaka, hobeto hitz egitea lortzen dut, mintzapraktikarekin. Lagun bati esango nioke gutxieneko euskara-maila daukanean hoberena mintzapraktikara joatea dela,hizkuntza ez galtzeko.

Euskaldun berria naizenez, askotan zaila egiten zait ezagutzen dudan jendearekin erregistroa gaztelaniatik euskarara aldatzea. Berbalagun taldearekin beti euskaraz izan behar dela barneratuta daukat, beraz, astean behin euskaraz egiten dut.

Euskara erabiltzeaz gain, lagun zoragarriak giro ezin hobean egin ditut. Zure euskara praktikan jarri nahi izanez gero, eskaintza zabala eta jende jatorra aurkituko dituzu mintzapraktika-egitasmoan. Eman izena ahalik eta azkarren, anima zaitez, zure zain gaude.

Programa hau oso zabala eta egokia da, eta denok parte hartzen dugu lotsarik gabe.

Euskaraz ahoz praktikatzeko talde egoki bat aurkitzeko laguntzen digute, eta aktibitate askoren berri ematen digute. Animatzen gaituzte, eta, alde horretatik, bikain nota emango nioke.

Euskara ez da soilik azterketa bat gainditzeko, baizik eta gure aisialdian disfrutatzeko, presio barik.

Euskaraz gehiagotan mintzatzeaz gain, egiten ditugun topaketei esker gure ingurumena eta historia ezagutzen ari naiz. Hori dela eta, lagunak izena ematera animatuko nituzke, oso giro ona sortzen delako hainbat esparrutan euskaraz mintza gaitezen.

Jarduera bikaina da. Han, euskara gustatzen zaion jendea ezagut dezaket. Oso jatorrak dira. Ondo pasatzen dugu. Ez dago presiorik. Taldeko jendea zu bezalakoa da. Akatsak egiten ditugu, baina elkarri laguntzen diogu.

Zerbait dakienak ahozkoan trebatzeko eta antzinako berba batzuk ikasteko, herriko esaerak (liburuetan ez direnak agertzen), ohiturak eta abarrak ezagutzeko. Jende berria ezagutzeko ere ona da.

Mintzapraktika-programa: euskaraz bizitzeko aukera bat. Etorri, praktikatu, lagun berriak ezagutu, hitz gutxitan: bizi euskaraz.

Jendea ezagutzeko era egokia, euskaraz praktikatzeko primerakoa eta ekintza desberdinak egiteko aukera. Nire esperientzia kontatuko nioke parte hartzeko asmoa duenari.